MKALI WA FILAMU NCHINI NIGERIA NA AFRIKA KUTUA DAR

MKALI wa filamu nchini Nigeria na Afrika, Omotola Jalade anatarajia kuzindua filamu ya Super Star nyota wa tasnia hiyo nchini Wema Sepetu, Jumapili katika Ukumbi wa Hoteli ya Girafee Ocean View, iliyopo Mbezi Beach.

Filamu hiyo imechezwa na Wema, ikionesha maisha ya mtu maarufu na changamoto anazozipata ikiwemo kuandikwa mambo mbalimbali ikiwemo taarifa za vyombo vya habari.

Katika uzinduzi huo, bendi ya Tanzania House Of Talent (THT) watatoa burudani, kabla ya mashabiki kupata nafasi ya kupiga picha na msanii huyo.

Omotola ambaye ni mke wa rubani Matthew Ekeinde, ambao walifunga ndoa yao angani kwenye ndege atatoa nafasi ya kupiga picha na watu mbalimbali.

Katika uzinduzi huo, pamoja na burudani ya muziki, mashabiki watakaofika hapo watapata pia fursa ya kuiona filamu ya Super Star katika viwanja hivyo vya hoteli hiyo iliyoko ufukweni.

Omotola ambaye yuko kwenye ndoa kwa miaka 16 akiwa na watoto wanne, ana jumla ya albamu mbili za muziki.

Msanii huyo ambaye mwaka jana alitangaza kuachana na kucheza filamu kutokana na kuandikwa vibaya, anatarajiwa kuwa kivutio kikubwa kwenye uzinduzi huo ambao kiingilio kitakuwa sh. 30, 000 kwa wakubwa na watoto sh. 10,000.